सब्बी तांऊ करडा
कम हा इंदा
सुखल्ला निआ ऐ
धना रा धंदा
धैडी राती वना मा रैणा
हौंदा रा हीत
हंसी करी सैणा
बरखा झडी री
परवाह न करदे
रिख वराग भी
असू तांऊ डरदे
पैरा सोगी गाई दिंदे
पहाड मैदान
गद्दी तांऊ होर न
ईठी कोई महान
...... मिलाप सिंह भरमौरी
नेता ही न करदे
सेवा समाजा री
रैना देआ छड्डा
नेता बनने रे खावा जी
भगवाना रा दर्जा
दिंदा समाज डाक्टरा जो
बुरे टैमा मंज दस्दा
चनना रास्ता सो
डाक्टरा तांऊ मोटा
भला कुन समाजा रा सेवक
जेडा मुर्दे मंज भी पाई दिंदा
जीने री फुक
मोट्टे मोट्टे नेता भी
डाक्टरा अग्गू रूंदे
डाक्टरा अग्गू लमे पैणे जो
बेबस भुंदे
अक्क सरकारी मास्टर भी
भुंदा समाजा रा सेवक
जे भोआ तेसा मंज
सेवा करने री निअत
तेस बले हा गरीब बच्चे री
सेवा करने रा मौका
जिनी पढी लिखी करी लाना
तरक्की रा चौका
तै घट न भुंदी तन्खा
डाक्टरा मास्टरा री
लख्खा तिकर पुजदे डाक्टर
सत्तर पच्तर तांई मास्टर
जै सई तरीके करन कम
ता सोईऐ भुंदे असली सेवक
फिरी भी जे सो नेता बनना चांदे
मुंजो ता लगदा
सो अपना ही घर भरना चांदे
........ मिलाप सिंह भरमौरी
धना रा डेरा
आगी रा घैणा
तम्बाकू री चिलम
तै बापु स्याना l
कौदरे री पिंदडी
सुखल्ली जिंदडी
दुदा रे कटोरे मा
रोटी मिंदनी l
दरीक सरीक
सब प्यारे
पता न अज्ज सो
करा गे धैडे l
..... मिलाप सिंह भरमौरी
बडी पुरानी गल हा
निके जिने असे भुंदे थिए
धना रे डेरे बैखी करी रेडिए पुर
असे खबरा हुनदे थिए
होली तांऊ धर्मशाला जो सडक बननी हा
हुनी करी बडे खुश भुंदे थिए
अबे ना रैह सो रेडिए
ना रैह सो ध्याडे
अबे बाल भी चिट्टे लगी पै भूना
पर हल्ले तांई सो सडक ना बनी
दस्सा भला असू
कस्स अग्गू रूणा
बडे बडे बदलाव भुची गे
सैटेलाइट इंदे मंगला पुर पुजी गे
होर भी अरो परो
कुतूने प्रोजेक्ट बनी गे
पर हल्ले भाईयो सडक ना बनी
किंया करी असु मरना जली
अक पीढी ता मुकी गई
अबे ता सडक बनाई देआ
बडी पुरानी डिमांड हा मनु री
अबे ता कम्म कराई देआ
......... मिलाप सिंह भरमौरी
अक्क बडी जरूरत हा सडका री
जरा हुना ता गल्ल मेरी बडका जी
होली तांऊ धर्मशाला जो बनाई देआ जी
जरा मुक्का ता परेशानी बरखा री
चम्बे तांऊ भरमौउरा ता
तुसे हेरूरा हा हाल
इँऐ प्रोजेक्टा वाले
के करी छडूरा हाल
सडका तिकर ता ईची पुजूरा पानी
अबे भगवान भरौसे हा मनु री जान
जे जोरा री पेई गच्छा बरखा री फांड
दरिया मंज गई समझा सडका री हांड
कोई करा ईलाज जैडा चिमडू हा घांड
ईलाज ऐईए अबे
अक्क वैकल्पिक सडक बनाई देआ
जैडी बेला सबेला भरमौऊरा जो
होरी ठारी सोगी मेली देआ
बडी पुरानी मांग हा मनु री
होली तांऊ धर्मशाला जो सडक बनाई देआ
इतना पैसा लाऊ कपदे ने प्रोजेक्टा पुर
थोडा जिना सडका रे नां पुर लाई देआ
.............. मिलाप सिंह भरमौरी
दिनके री घार
---------------
बडी बुरी हा टेरी मार
ऐ हा भाईयो दिनके री घार
कितना भी मारू भोया ड्राइवर
रोकी देंदी ऐ पहिए री रफ्तार
जरा करी जे बरखा भुची गई
समझा दिनके री घार पैई गई
दुई धैडे जे जोरा रा ही गो
समझा मोटा सयापा पैई गो
कोई ता भाईयो बाईपास निकाला
जैडा भरमौरा जो खडामुखा सोगी मेला
पुल बना भौंए सुरंग बना कोई
खत्म ता भोआ ऐ रोजा रा झमेला
जरूरी भी कई बारी नकैणा भुंदा
घारी बले इची करी फसी बैखदे ने
जम्मन मरन , अते व्याह मुकाणी जो
किंआ करी गाणा हची बैखदे ने
सोचा भाईयो कुछ ता सोचा
किंआ करी हल टेरा निकली सकदा
किंआ करी , के जिना तिगडम लाइया
सोचा किंआ करी टेरा बाईपास निकली सकदा
---------- मिलाप सिंह भरमौरी
पाल कमांदे दराट चलाई
फौजी कमांदे बंदूक चलाई
ते नेते कमांदे भाईयो लारे लाई
दो हजार सत्तारा इने वाला
नौऐ नौऐ लारे लगी पैने लगना
शिलान्यास बी बडे भरी भूने
छली छली करी गरीबा जो ठगना
अक्क बारी ता भाईयो छडना हुनाई
पुराने लारे कुतूने पूरे भुए भाई
होली रे ग्रां पानी जो हल्ले भी रूंदे ने
तैठी भी अक्क शिलान्यास भुआ थू भाई
बडे साला री हुनदे आए गप्पा
होली तांउ धर्मशाला जो बननी सुरंगा री सडका
जोता थल्ले भी अक्क सुरंग बनाना लाई थी
बनी करी रैई गई सब कोरी गप्पा
पांगी बैचारी रा भी सोईए हाल
अक्क तैठी भी सुरंग कडना लाईआ
बनी गच्छा ता होर के चैंइदा
पर अंदरूनी गल्ला जो कुन जाना भाईया
------- मिलाप सिंह भरमौरी
ऐ सडका रे डंगे
रोजा रे पंगे
सिद्दे सुरंगा कजो न निकाली दिंदे ने
अक्क निकाली दीन
धर्मशाला तांउ होली जो
अक्क निकाली दीन
चम्बे तांउ चुआडी जो
चौबिया जो लाउला सोगी कजो न जोडी दिंदे ने
अप्पू भुची गानी तरक्की मती
कुदरता रा खजाना मता भरा इठी
कजो हक्का पांदे विकासा करने री
पर्यटना कनारी न ध्यान कजो रति दिंदे ने
-------- मिलाप सिंह भरमौरी
निक्के री अडी तै
जनानी रे दा
भगवान न कस्सी जो
इती मा हचा
पदरी बत्ता मंज फिरी
कवई इंदे हा
जे रूची गई गल भाईयो
करी देआ वाह
----- मिलाप सिंह भरमौरी
आंउऐ न बलदा
दुनिया बलदी
भरमौउर बडा मोटा खजाना हा
कुदरते दितुरा
ऐस जो रूप मस्ताना हा
देवते बसदे धारा धारा
करदे घर घर
सब्बी पुर मेहर
दवाई तांउ निआ इठी री व्यार
ठंडा पानी दिंदा किस्मत फेर
होली , ग्रोंडा
कुगती , गरोला
घर घर बसदा धूडू भोला
सिरडी, किंयूर
सुनारा , पियूरा
घर घर भुंदा हा चोला डोरा
कल्चर इंदा संभालने वाली
धन धन भोआ अपनी छतराडी
बडी छैल हा औउरा फाटी
मेहर करे तू मा भरमानी
------ मिलाप सिंह भरमौरी
चली आई गर्मी ते पेई गोआ फट
लगी पै लगना इठी बिजली रे कट
बडा कुजीन आ भाईयो पंजाबा मंज
दिल करदा चली इच्छू भरमौउरा जो झट
------ मिलाप सिंह भरमौरी
रित बदली, सब किश बदलू
पुंगरी पै ने हेर रुखा रे डाल
चुकी ले छिकनू भाई मलापा
लौहला कनारी धना जो लार
ऐत्त जांदरा मा तची पेई धुपा
लैंदे अबे जोता री ठंडी बयार
नैल पहाड घुमी हेरी सब मैई
सबी ताऊ बदिया अपनी ठार
------ मिलाप सिंह भरमौरी
अज्ज घुमने रा मूढ बनाउरा
चर पकडी लै हत्था मा हौठी
लाई इंदे स्वर्गा रा फेरा
कजो रखने जज्बात ऐ रोकी
चल हेरी इंदे
बजोल , चुनेड ग्रोण्डा
नोऐग्रां री करी इंदे सैर
गुवाडी , घडो, दियोल
दुई धैडे ता इठी तू ठैर
शिवजी रा बास किंयूर
केंलगा री कलाह, कुलैठ
मुलना सकून बडा भरी
ठिकी करी इठी ता बैठ
कजो भटकदा ऐरा ओरा मनुआ
मुलनी ना इनी जिनी ठार
स्वर्ग ने सच आउं बलदा
स्वर्ग ने अपने पहाड
----- मिलाप सिंह भरमौरी
पुंगरी पैणे सेओ क्रुंई
चुबनी न ऐवे हीता री सुई
कटी लैउ कठन हौंद मता जिना
रैयी गै बस ऐवे ध्याडे दुई
फिरी इने धना वाले, ठैर जरा करी
खत्म समझी लै भाल ऐवे भुई
----- मिलाप सिंह भरमौरी
इन्ने मनु तांउ झट्ट करी के
अपना दोस्त तु रिश्ता तरोड
जेडे मुंहा पुट्ठी हिक्का रे बनदे
पिट्ठ परोही करदे चर्चा होर
----- मिलाप सिंह भरमौरी
जवाना री भुंदिआ भाइयो ऐ लोहडी
बुड्ढे बेचारे किंया खान रियोडी
नुहा ता चली गई पिओके जो
ते पुत्र भी चली गै तिंआरी पिचौरी
आग न जलदी सिन्नी छिडी सोगी
परात चुकाई करी बुड्डिऐ फकौडी
जे इज्जत भुल्ली दिला मा बुजुर्गा तांए
तांए जचनी आ भाईयो ऐ लोहडी
------ मिलाप सिंह भरमौरी
