टपरु

इन्ना नई जमीर कमीना दे

भाई मसले बुरे जमीना दे।

शामी सवेरे बाड़े दियां गल्ला

बैठो नेडे  जिन्ना दे।

भरोंदाई नई लालची छबडू 

मालक चाहे किन्ना दे ।

कोठियां पाई भी रूह नई बदली

खरे थे टपरू टीना दे।

मेरी गल मनेगा

जे मेरी गल मनेगा तू प्रीता तां लानी।

नई ता मेरी  न तेरी  तूं जानी।।

चूल्हा चौका भी बराबर करना ए ।

रोटियां पकानी मैं  छिड़ियां तू लानी।।

भांडे टिंडे  भी  बराबर  करने ने।

भांडे मांजने मैं छलनी तू लानी।।

डंगर  बछु भी  बराबर  करने ने ।

घा  बड़ना ए  मैं  त्योडी  तू  लानी।।

संबलू सोता भी बराबर करना ए।

रोटियां  सेकनी  मैं फूका  तू  लानी।।

               .....मिलाप सिंह भरमौरी।