milap singh bharmouri

milap singh bharmouri

Thursday 8 September 2016

Sattu ra supna

सत्तू रा सुपना
------------------

फिरी करी जांदरा तांउ
गधैरना मा बसना
कम्म निआ ऐ तुना आसान
लोभी भुंदे भुची गछुरे भगैल
बडा भरा भाईयो करदे परेशान

अक्क आंटी थू मेरा सत्तू भाई
जांदर रैंदा थू करदा थू कोई नेक कमाई
तैेजो बडा घमंड थू
अपने गधैरना वाले भाई पुर
हुनदा न थू तसेरी
सो कस्सी तांउ बुराई

तसेरे हवाले ही सब करी थैउरे थिए
अपने खेतर ,बगडी तै अपना साजी रा घर
सत्तू बचारे वले किराया न भुंदा थू
के करदा,जांदर वनाडा मा दी थैउरा थू हैर

पर तैठी वनाडा मा पैई करी
सो सोचदा रैंदा थू
अक्क धैडे मुं भी अपने
गधैरना जो फिरना
अपना नोआ घर बनाना
पुट्टी करी जैडा हैस्से मंज हा पुराना
तै अपने शरीका भगैला मां मु भी हंडना

इंआ सोचदे सोचदे सोचदे
बडे साल भुची गै
निक्के भी तसेरे अबे
खरे मोट्टे भुची गे
दाने पानी रा भी खरा
सरकल चली पैउ
तिनि सोचू खरा टैम आ
अबे गधैरना जो चलदे

सत्तू चलू गधैरना जो
पिट्ठी छिकनू पाई करी
अपने भगैला सोगी रैणे रे सुपने लैई करी
सत्तू पुज्जू गधैरने
बंदे अपने भाई रे पैर
भाई मुंजो फिरदे फिरदे लगी गो बडा टैम

भाई अबे न फिरी करी मु
जांदरा जो गाना
अपना पुट्टी करी ईठीए नोआ घर बनाना
अपने दरीका शरीका सोगी मिलना बरतना
अपने बुजुर्गा री
ऐस्स ही चिक्का मां रैणा

सत्तू रा भाई ता हुनदेई भुची गो जैईला
ऐ कटाउं चली आ नोआ मेरी हिक्का जो किला
ओ हला ऐस ठारी पुर ता मु लैटरिंग बनानी थी
सत्तू रा भाई ता लगू भूना नीला नीला.......

   .......... मिलाप सिंह भरमौरी

भाईयो फिरी सत्तू बेचारे किंआ किंआ घर बनाउ ऐ मु अगली पोस्ट भैजला..कविता थोडी लंबी हा......

Tuesday 24 May 2016

नणैली रा ग्रां

नणैल भुंदा हा प्यारा
------------------------

नणैल भुंदा हा सब्बी जो प्यारा,
निक्का भोआ जां भोआ स्याना !

छुट्टी पैणे जो महीना भुंदा हा,
निक्के बलदे ने नणैला जो गाणा !

भुंदे नन्नू -नन्नी जो बडे ही प्यारे,
ध्योत्रू ध्योत्री जो चा सोगी खोआना !

मुली इना मियों जिंदे स्याने सोगी,
फिरी न इंदा फीरी वक्त पुराना !

          ....... मिलाप सिंह भरमौरी




Monday 25 April 2016

केलंगा रा मंदर

बदलाब जरूरी हा
टैमा सोगी
झीकी रैणा
बनाई दिंदा हा रोगी

मनु भोआ जां
रीती रिवाज
सब्बी जो लाई लैना
चिंदा टैमा रा साब

अक्क बडी पुरानी
रीत हा इंदी
हल्ले तांई भी
हा पूरी सो जिंदी
केलंगा ते भोआरी रे
मंदरा मंज
जनानी न कोई
इंदे समाजा री गंदी

मुंजो ता लगदा
अबे टैम चली आ
ऐस बडी पुरानी
रिता जो मुका
मना चिता सोगी
करदी पूजा जनानी
इंआ जो बी मंदरा मां
पूरा हक देआ

घरे बी सोचा
के भुंदा हा
संज भुंदे ही
मर्द लाई लैंदे घुटकू
फिरी राग लाई थैंदी
मरदा जो जनानी
धूप धुखा ,धूप धुखा
पर किंआ धुखान
लाई के लैउरा भुंदा घुटकू

..... मिलाप सिंह भरमौरी