टपरु

इन्ना नई जमीर कमीना दे

भाई मसले बुरे जमीना दे।

शामी सवेरे बाड़े दियां गल्ला

बैठो नेडे  जिन्ना दे।

भरोंदाई नई लालची छबडू 

मालक चाहे किन्ना दे ।

कोठियां पाई भी रूह नई बदली

खरे थे टपरू टीना दे।

मेरी गल मनेगा

जे मेरी गल मनेगा तू प्रीता तां लानी।

नई ता मेरी  न तेरी  तूं जानी।।

चूल्हा चौका भी बराबर करना ए ।

रोटियां पकानी मैं  छिड़ियां तू लानी।।

भांडे टिंडे  भी  बराबर  करने ने।

भांडे मांजने मैं छलनी तू लानी।।

डंगर  बछु भी  बराबर  करने ने ।

घा  बड़ना ए  मैं  त्योडी  तू  लानी।।

संबलू सोता भी बराबर करना ए।

रोटियां  सेकनी  मैं फूका  तू  लानी।।

               .....मिलाप सिंह भरमौरी।

सबदा सफर

कुछ रितां इस संसार दियाँ।

रोज ताने रेंदियाँ मारदियाँ।

सुनी जा बस इक कन्ने तों

कुछ अंदर कुछ बारदियाँ।

सबदा सफर मुकम्मल होना

कुछ जितदे कुछ हार देयां।

मन छड़ स्यापे  सौचां  दे सब

चल सैरां  करिए पहाड़ दियाँ।

...... मिलाप सिंह भरमौरी

सब्बी तौं छैल इंदा भरमौर।

लानी करा असू ठार कोई होर।

सब्बी तौं छैल इंदा भरमौर।

ऊचे ऊचे पहाड़ मंज चौरासी रे मन्दिर

ठीक भुची गन्दे इठी इची सब जंदर

सब मनु भोले इठी न कोई चोर

सब्बी तौं छैल इंदा भरमौर।

धुपा मंज जने सब दुनिया जलदी

ठंडी ठंडी व्यार भून्दी इठी तने चलदी

किन्ने छैल भुन्दे इठी सेओ कने खोड

सब्बी तौं छैल इंदा भरमौर।

बुद्ला री छेड़ बड़ी छाँय छाईं करदी

पहाड़ री चुंडी जियाँ चांदी साईं लगदी

कीड़े साईं हुजड़े सडका रे मोड़

सब्बी तौं छैल इंदा भरमौर।

........ मिलाप सिंह भरमौरी

नटुआ भाई चीफ गेस्ट

नटुआ भाई चीफ गैस्ट
----------------------

अक्क थू नटुआ
अक्क थू चटुआ
अक्क थू बटुआ

थिए तरौ ही पक्के यार
यारी इन्ही के मरने जो तैयार

गर्मी रा टैम थू
तरौ बैखुरे थिए क्रूंई री छांई
नटुए रे मना मा अचानक
अक्क गल आई
बडे डुग्गे हा सोगी बंदा
गल हुन मेरे चटुए भाई

अंउ सोचू करदा
मनु इज्जत किंआ कमांदे ने
तिंआ जो हुनी करी
मनु ताली किंआ बजांदे ने

चटुआ बडा चालाक
सो हस्सु दी करी खडाक
ऐ ता नटुए
मेरे बांए हत्था रा कम्म हा
तूना भी पता निआ तुजो
तु ता जम हा

हुन
ऐस सीना री
इंआ करी सूरत हा
बस ऐस कम्मा तांए
बटुए भाई री जरूरत हा

बटुआ भी तिंआरा थू पक्का यार
झट भुची गो हुनी करी तैयार
चटुए ऐ कुन गल बल्ली हा
कम्मे कने इना बटुआ यार

चटुए झट तू गल्ला री
हकीकत बता
इंदे नटुए भाई री
मती सारी इज्जत बना

हां ता बटुए
इंआ करी करदै
दुई चौउर ग्रां रे
निके निके दब्बू जो हददै
मैच करांदे बैट बोल्ला रा
तै अपने नटुए भाई जो
चीफ गैस्ट हददै

नटुआ ते बटुआ अक्क दम उलरे
गल्ल ता भाई इज्जता बाली हा
पर खैडना इन ग्रां रे दब्बू
ऐ ता गल कुछ लगदी काली हा

के गल करदा
दब्बुए किंआ न इना
अपने पैसे सोगी असू
सब्बी टीमा जो
अक्क अक्क बैट दीना
तै जितने बाले जो
इक्की हौ इनाम भी
अपनी जैबा तांउ दीना

हारने वाले जो भी ट्रोफी तै
सब्बी खिलाडी जो मोमैंटो
फिरी किंआ न भुंदा
इंदे नटुए भाई जो
सब्बी कनारी तांउ थैंक यू थैंक यू

चटुए भाई तू ता
सच हा बडा भरी ग्यानी
तैंई ता मिंटा मंज
मुकाई दिती हा
नटुए भाई री परेशानी

    ....... मिलाप सिंह भरमौरी

नोट :  भाईयो ऐस रचना मंज सब पात्र काल्पनिक हिन . जे कस्सी सोगी समानता पाई गंदी हा ता ऐ मात्र संयोग ही भुना हा...

फेक आई डी

भूती गाणा इंऐं फेक आई डी वाले।
दस दस अक्की जिने बनाई थैउरी।

ऐ मते जिन निन, हिन पंज सत जिन
जिंए पूरे गद्दी री निंद्र उडाई थैउरी।

बडे पढे -लिखे ऐ समजदे अप्पू जो
भंगिए ते पैग्गिए जुंडली बनाई थैउरी।

बनी बैखूरे ऐ बडे राजनीति रे माहिर
अपनी अकली जो कुंडी लाई थैउरी।

चिमडी गच्छूरे बस अक्की री पचौरी
बदनाम करने री कसम इंऐ खाई थैउरी।

सुधरी गच्छा फेक आई डी वालेओ
के अमरसिरा री पर्ची पैले कटाई थैउरी।

लगदा सर्जरी भी तुंदे न कम इंनीआ
अपने मिंजू मा इनी बिमारी पाई थैउरी।

  ......... मिलाप सिंह भरमौरी

   ।जय हो भाईचारा। जय मणिमहेश।

बूड्ढा बेचारा केला धना जो चारा

बूड्ढा बेचारा
केला धना जो चारा
पुत्र फिरी भी बलदा नकारा

केले डाकदा नाला खौला मा
रित हौंद भौआ या बरसाला
बैला सांए गिरदा अरो परो 
पुत्र फिरी भी कजो लगदा प्यारा

ठगने पुट्ठी बैखी शूरा बुड्ढे जो
बलदा पैउ अज्ज ऐ पाडा
अज्ज ओ पाडा
कतूने धैडे चलली अक्की री कमाई
जे सब्ब बेची छड्डी ता फिरी के खाना

जे होर कम्म निंआ ता
मिंआ धना जो ही चारी लै
बूड्ढे जो थोडा जीना भूची गल्ला सहारा
धना चारदे इज्जत न घटदी
पर बडा बुरा भुंदा ठग बठग्गी रा लारा

........ मिलाप सिंह भरमौरी