करी लैऊ घा मैई
बेला तै बसूटी वाला
खैईर ते कैंईथ
गरने रे जाडा वाला
इस बारी हौद
बदिया नकैई गाणा
खुल्ले ने वन
बूटे री उजाड निया
पाल वी अपना
डाकने जो हौ बियां
बंज्जा री वल्ली पुर
टपरी बनाई लैनी
फौजी वाली उप्पर
तरपाल पाई लैनी
धने मेरे ऐस बारी
शीसे सांई लिश्कना
भेडा मेरी हेरी करी
सब्बी जिने हिरखना
---- मिलाप सिंह भरमौरी
निकू शुकू वाले मणू जे भाईयो
हथ पान सकूले पढदी कुली जो
इने जिने मनू रा धर्म इमाम
समझि लेया सब कुछ चिक्का मा रुली गो
सो मणु न रेऊरा , भूत बनी गछूरा
भंग शराब तसेरे खूना मंज रली गछूरा
न दीनी चैंईधी कसी जो तसेरी धडैईत
काला मुंह करी करनी चैंईधी शितर परैड
भैउरे मणु जने ऐरा उरा मुंह मारदे
बसुरा बसूरा कसी रा घर उजाडदे
चुप न रैहना चैंईदा तनै गरां वाले जो
विरोध करना तनै मिली करी सबी जो
इन्हें जिन्हे मणु दुश्मन ने समाजा रे
कोई भी भुची सकदा ईंयारा शिकार
हुक्का पानी बंद करी करी ईया जो
पैणी चैंइदी वरादरी तांऊ लताड
------- मिलाप सिंह भरमौरी
अंदर गरडू बार रजाई
हौंदा री ठंडी रित चली आई
हिंयू री खला मंज गन्नी लगनी
वना तांऊ गिची करी लेई इंदे जंगनी
द्रीली भुज्जी भुज्जी चा सोगी खानी
घंडौली री तिल्ली तै कुकडी भुजानी
ठारी ठारी पुर भाईयो टन्ननन जे लगनी
फिरी जमी गाना नलके रा बगदा पानी
------ मिलाप सिंह भरमौरी
