milap singh bharmouri

milap singh bharmouri

Wednesday, 12 August 2015

दिनके री घार

दिनके री घार
---------------

बडी बुरी हा टेरी मार
ऐ हा भाईयो दिनके री घार
कितना भी मारू भोया ड्राइवर
रोकी देंदी ऐ पहिए री रफ्तार

जरा करी जे बरखा भुची गई
समझा दिनके री घार पैई गई
दुई धैडे जे जोरा रा ही गो
समझा मोटा सयापा पैई गो

कोई ता भाईयो बाईपास निकाला
जैडा भरमौरा जो खडामुखा सोगी मेला
पुल बना भौंए सुरंग बना कोई
खत्म ता भोआ ऐ रोजा रा झमेला

जरूरी भी कई बारी नकैणा भुंदा
घारी बले इची करी फसी बैखदे ने
जम्मन मरन , अते व्याह मुकाणी जो
किंआ करी गाणा हची बैखदे ने

सोचा भाईयो कुछ ता सोचा
किंआ करी हल टेरा निकली सकदा
किंआ करी , के जिना तिगडम लाइया
सोचा किंआ करी टेरा बाईपास निकली सकदा

---------- मिलाप सिंह भरमौरी

Thursday, 7 May 2015

Surnga ri sadka

पाल कमांदे दराट चलाई
फौजी कमांदे बंदूक चलाई
ते नेते कमांदे भाईयो लारे लाई

दो हजार सत्तारा इने वाला
नौऐ नौऐ लारे लगी पैने लगना
शिलान्यास बी बडे भरी भूने
छली छली करी गरीबा जो ठगना

अक्क बारी ता भाईयो छडना हुनाई
पुराने लारे कुतूने पूरे भुए भाई
होली रे ग्रां पानी जो हल्ले भी रूंदे ने
तैठी भी अक्क शिलान्यास भुआ थू भाई

बडे साला री हुनदे आए गप्पा
होली तांउ धर्मशाला जो बननी सुरंगा री सडका
जोता थल्ले भी अक्क सुरंग बनाना लाई थी
बनी करी रैई गई सब कोरी गप्पा

पांगी बैचारी रा भी सोईए हाल
अक्क तैठी भी सुरंग कडना लाईआ
बनी गच्छा ता होर के चैंइदा
पर अंदरूनी गल्ला जो कुन जाना भाईया

  
------- मिलाप सिंह भरमौरी

Wednesday, 6 May 2015

सडका रे डंगे

ऐ सडका रे डंगे
रोजा रे पंगे
सिद्दे सुरंगा कजो न निकाली दिंदे ने

अक्क निकाली दीन
धर्मशाला तांउ होली जो
अक्क निकाली दीन
चम्बे तांउ चुआडी जो
चौबिया जो लाउला सोगी कजो न जोडी दिंदे ने

अप्पू भुची गानी तरक्की मती
कुदरता रा खजाना मता भरा इठी
कजो हक्का पांदे विकासा करने री
पर्यटना कनारी न ध्यान कजो  रति दिंदे ने

-------- मिलाप सिंह भरमौरी

Tuesday, 5 May 2015

निक्के री अडी

निक्के री अडी तै
जनानी रे दा

भगवान न कस्सी जो
इती मा हचा

पदरी बत्ता मंज फिरी
कवई इंदे हा

जे रूची गई गल भाईयो
करी देआ वाह

----- मिलाप सिंह भरमौरी

Saturday, 25 April 2015

भरमौरा री वादी

आंउऐ न बलदा
दुनिया बलदी
भरमौउर बडा मोटा खजाना हा
कुदरते दितुरा
ऐस जो रूप मस्ताना हा

देवते बसदे धारा धारा
करदे घर घर
सब्बी पुर मेहर
दवाई तांउ निआ इठी री व्यार
ठंडा पानी दिंदा किस्मत फेर

होली , ग्रोंडा
कुगती , गरोला
घर घर बसदा धूडू भोला
सिरडी, किंयूर
सुनारा , पियूरा
घर घर भुंदा हा चोला डोरा

कल्चर इंदा संभालने वाली
धन धन भोआ अपनी छतराडी
बडी छैल हा औउरा फाटी
मेहर करे तू मा भरमानी

------ मिलाप सिंह भरमौरी

Thursday, 23 April 2015

बिजली रे कट

चली आई गर्मी ते पेई गोआ फट
लगी पै लगना इठी बिजली रे कट
बडा कुजीन आ भाईयो पंजाबा मंज
दिल करदा चली इच्छू भरमौउरा जो झट

    ------ मिलाप सिंह भरमौरी

Wednesday, 22 April 2015

रित बदली

रित बदली, सब किश बदलू
पुंगरी पै ने हेर रुखा रे डाल

चुकी ले छिकनू भाई मलापा
लौहला कनारी धना जो लार

ऐत्त जांदरा मा तची पेई धुपा
लैंदे अबे जोता री ठंडी बयार

नैल पहाड घुमी हेरी सब मैई
सबी ताऊ बदिया अपनी ठार

------ मिलाप सिंह भरमौरी