अज्ज घुमने रा मूढ बनाउरा
चर पकडी लै हत्था मा हौठी
लाई इंदे स्वर्गा रा फेरा
कजो रखने जज्बात ऐ रोकी
चल हेरी इंदे
बजोल , चुनेड ग्रोण्डा
नोऐग्रां री करी इंदे सैर
गुवाडी , घडो, दियोल
दुई धैडे ता इठी तू ठैर
शिवजी रा बास किंयूर
केंलगा री कलाह, कुलैठ
मुलना सकून बडा भरी
ठिकी करी इठी ता बैठ
कजो भटकदा ऐरा ओरा मनुआ
मुलनी ना इनी जिनी ठार
स्वर्ग ने सच आउं बलदा
स्वर्ग ने अपने पहाड
----- मिलाप सिंह भरमौरी
पुंगरी पैणे सेओ क्रुंई
चुबनी न ऐवे हीता री सुई
कटी लैउ कठन हौंद मता जिना
रैयी गै बस ऐवे ध्याडे दुई
फिरी इने धना वाले, ठैर जरा करी
खत्म समझी लै भाल ऐवे भुई
----- मिलाप सिंह भरमौरी
इन्ने मनु तांउ झट्ट करी के
अपना दोस्त तु रिश्ता तरोड
जेडे मुंहा पुट्ठी हिक्का रे बनदे
पिट्ठ परोही करदे चर्चा होर
----- मिलाप सिंह भरमौरी
जवाना री भुंदिआ भाइयो ऐ लोहडी
बुड्ढे बेचारे किंया खान रियोडी
नुहा ता चली गई पिओके जो
ते पुत्र भी चली गै तिंआरी पिचौरी
आग न जलदी सिन्नी छिडी सोगी
परात चुकाई करी बुड्डिऐ फकौडी
जे इज्जत भुल्ली दिला मा बुजुर्गा तांए
तांए जचनी आ भाईयो ऐ लोहडी
------ मिलाप सिंह भरमौरी
सिद्दे रा भुंदा नराण वो भाईया
अज्ज मुलू हा ज्ञान वो भाईया
पैडी ताऊं ओसदे लुडी पैऊ थू
मसे बचे हिन प्राण वो भाईया
---मिलाप सिंह भरमौरी
तरडियां पुटदे
@@@@@@
कल बडी भरी
रुचुआं बरखा पैई
चुकी लै कुदालू ते
बेलचा कैई
चल भैठी जाई के
तरडियां पुटदे
होंदी नी सब्जी कोई
इसदे जैई
बिना पैसे तो
मिली जांदी ऐ
फैदे भी होंदे
इसदे कई
बडी निरोगी होंदीए ऐह
स्वाद भी लगदा
मीटे सेंई
कल ढावा पुर
दिखी थी इक बेल पुरानी
जोर बी ज्यादा
लगना नैई
----मिलाप सिंह भरमौरी
ढेर लगी गे हिंयूआ रे
ही ही अंम्बरे करू कमाल
चांदी ए चांदी हुजदा सारे
सेओ भूने खरे ऐस साल
भित्त चढाई चुल भखाई
रखी लेयू नेडे हुंगरी रा थाल
देसी रे पैगा पुर पैग बनाए
भजी तरुटी गे फिरी गमा रे डाल
---- मिलाप सिंह भरमौरी
